బిచ్చగాడు’కి డిమాండ్ బాగా ఉంది. 200 సెంటర్లలో 75 రోజులుగా ఈ ‘బిచ్చగాడు’కి కలెక్షన్ల గలగలలు గట్టిగా వినిపిస్తున్నాయి. ఈపాటికే మీకు అర్థమైపోయిందనుకుంటా? మనం మాట్లాడుకుంటుంది బిచ్చగాడు సినిమా గురించి అని.! సైలెంట్‌గా వచ్చి వైలెంట్ హిట్ కొట్టిన బిచ్చగాడు సినిమా, ఈ మధ్యకాలంలో ఏ స్టార్ హీరో సినిమాకి సాధ్యపడని విధంగా ఏకంగా 200 థియేటర్లలో 75 రోజులు విజయవంతంగా పూర్తి చేసుకొని 100 రోజుల వైపు దూసుకెళుతుంది.
బిచ్చగాడు రిలీజైనప్పటి నుంచి హిట్‌టాక్‌తో నడిచింది. మొదట్లో చాలా తక్కువ థియేటర్లల నుంచి క్రమంగా వందల థియేటర్లకు విస్తరించింది. విజయ్ ఆంటోని, సత్న టైటస్‌ జంటగా ఫాతిమా ఆంటోని నిర్మించిన చిత్రం ‘పిచ్చైకారన్‌’. ఈ చిత్రాన్ని తెలుగులో ‘బిచ్చగాడు’ పేరుతో మే 13న విడుదల చేశారు. ఓ కోటీశ్వరుడు కొన్ని పరిస్థితుల కారణంగా బిచ్చగాడుగా మారి రోడ్లపై బిచ్చమెత్తుకుంటే అతనికి ఎదురైన అనుభవాలేంటి అనే కాన్సెప్ట్ తో సినిమా ఉంటుంది. ఈ సినిమాలో విజయ్ ఆంటోనీ అద్భుతమైన నటన, దర్శకుడు శశి మేకింగ్ తీరుతో ఈ సినిమా సక్సెస్ అయ్యింది. ఇంకా తల్లికొడుకుల సెంటిమెంట్‌తో ప్రేక్షకులను ఈ సినిమా భారీ స్థాయిలో ఆకట్టుకుంది.
భారీ అంచనాల మధ్య విడుదలైన ఎన్నో సినిమాలు ఓ పక్క ప్రేక్షకులను నిరాశ పరుస్తుంటే, ఏ అంచనా లేని బిచ్చగాడు ఈ రేంజ్ హిట్ కొట్టడం మాటలు కాదు. బ్రహ్మోత్సవం, అ..ఆ.., కబాలి వంటి పెద్ద సినిమాల ధాటిని తట్టుకుని, తనకంటూ ఓ ఇమేజ్‌ను ఏర్పరుచుకొంది బిచ్చగాడు. తెలుగు రాష్ట్రాల్లో పెద్దగా అంచనాల్లేకుండా విడుదలైన ఈ సినిమా కేవలం పబ్లిక్ మౌత్‌టాక్‌తోనే పుంజుకుని హౌస్‌ఫుల్ కలెక్షన్లతో అదరగొడ్తోంది. మంచి చిత్రాలను తెలుగు ప్రేక్షకులు ఆదరిస్తారనడాని బిచ్చగాడు సినిమా మరోసారి నిరూపించింది.