కమల్ ను ఏడ్పిస్తున్న కామెడీ మూవీ

లోకనాయకుడు కమల్ హాసన్, ఆయన కూతురు శృతి హాసన్, రమ్యకృష్ణ, బ్రహ్మానందం ప్రధాన పాత్రలుగా తెరకెక్కాల్సిన కామెడీ- అడ్వెంచరస్ చిత్రం ‘శభాష్ నాయుడు’. తెలుగు, తమిళం, హిందీ మూడు భాషల్లో ఈ చిత్రం తెరకెక్కించనున్నారు. ఈ చిత్రానికి రచయితగా, నటుడిగా, నిర్మాతగా, దర్శకుడిగా కమల్ అన్నీ తానై వ్యవహరిస్తున్నారు. కమల్ తాను నటించిన దశావతారం చిత్రంలోని బలరాం నాయుడు పాత్రనే ఈ సినిమాలో పోషించనున్నారు.

అయితే ఈ ‘శభాష్ నాయుడు’ చిత్రానికి అడుగడుగునా అడ్డంకులే ఏర్పడుతున్నాయి. నిజానికి ఈ చిత్రాన్ని టి.కె.రాజీవ్ కుమార్ అనే దర్శకుడు రూపొందించాల్సింది. కానీ ఆయన అనారోగ్య కారణాల వలన తప్పుకోవడంతో కమల్ హాసనే స్వయంగా ఈ చిత్రాన్ని డైరెక్ట్ చేయడానికి నిర్ణయించుకున్నారు. మరోవైపు ఈ సినిమా టైటిల్ కూడా ఒక వర్గపు వారినే హైలైట్ చేసే విధంగా ఉందని కొన్ని వర్గాల ప్రజలు కోర్టులో కేసు పెట్టారు.

ఇది కాకుండా రీసెంట్ గా కమల్ హాసన్ తన ఆఫీస్ మెట్ల మీద నుండి పడిపోవడంతో డాక్టర్స్ రెండు నెలలు వరకు ఖచ్చితంగా బెడ్ రెస్ట్ తీసుకోవాలని సూచించారు. దీంతో ఈ సినిమా షూటింగ్ కాస్త సెప్టెంబర్ కు వాయిదా పడింది. ఇలా ఒకదాని తరువాత ఒకటి అన్నట్లుగా కమల్ సినిమాకు అడ్డంకులు వస్తూనే ఉన్నాయి. ఈ నేపథ్యంలో గ్యాప్ రాకూడదని కమల్ తన ‘విశ్వరూపం’ సినిమాకు సీక్వెల్ గా రూపొందించిన ‘విశ్వరూపం2’ ని చూపించడానికి సిద్ధమైనట్లు తెలుస్తోంది.