భ‌విష్య‌త్తు చేజారిపోతే ఏం చేస్తాం?

May 30, 2020 at 10:17 pm

“మన చేతిలో లేని పరిష్కార మార్గాల గురించి ఆందోళన చెందడం అర్థంలేనిది. లాక్‌డౌన్‌ వల్ల ఎవరూ నిరుత్సాహపడాల్సి అవసరం లేదు. ప్రతిరోజును యథాతథంగా స్వీకరిద్దాం. మనకున్న వనరులను బట్టి క్రియాశీలకంగా పనిచేస్తూ జీవితాన్ని తీర్చిదిద్దుకుందాం. పరస్పరం సహకారంతో ఈ సంక్షోభాన్ని అధిగమించే ప్రయత్నం చేయాలి. భవిష్యత్తు గురించి అంచనా లేనప్పుడు వాస్తవాన్ని అంగీకరించడం మినహా మరో మార్గంలేదు”…అంటూ లాక్‌డౌన్‌ వల్ల ఉత్పన్నమైన పరిస్థితుల గురించి తాత్వికధోరణిలో స్పందించింది తాప్సీ. భవిష్యత్తు గురించి ఆందోళన చెందకుండా వర్తమానాన్ని యథాతథంగా స్వీకరించాలని హితవు పలికింది. బతుకుల్ని కమ్మేసిన మేఘాలు తొలగిపోయి నూతనోదయం కలుగుతుందని ఆశాభావం వ్యక్తం చేసింది.

నేను ఇటీవల మీడియాకు దూరంగా ఉన్నా. లాక్‌డౌన్‌ సమయంలో చాలా మంది తారలు రకరకాల యాక్టివిటీస్‌తో వార్తల్లో నిలిచారు. నా సన్నిహితులు “ఎప్పుడు హుషారుగా, సందడి చేస్తూ కనిపించే నువ్వు..లాక్‌డౌన్‌ ప్రకటించగానే ఒక్కసారిగా మౌనం దాల్చావు. కారణమేంటి?” అని ప్రశ్నించారు. దానికి ప్రత్యేకమైన కారణాలు లేవు. గత రెండేళ్లుగా ఆరు సినిమాలు చేశాను. తీరికలేని షెడ్యూళ్లతో ఏనాడు విరామం దొరకలేదు. బిజీగా సాగుతున్న నా లైఫ్‌కు లాక్‌డౌన్‌ వల్ల కావాల్సిన బ్రేక్‌ దొరికినట్లనిపించింది. ఇప్పుడు ప్రతిరోజు తొమ్మిది గంటలు నిద్రపోతూ ఈ విరామాన్ని ఆస్వాదిస్తున్నా.

గృహహింసను కథావస్తువుగా తీసుకొని నేను ప్రధాన పాత్రలో నటించిన ‘థప్పడ్‌’ నాకు ఎంతో సంతృప్తినిచ్చింది. థియేటర్స్‌లో రెండు వారాల పాటు విజయవంతంగా ప్రదర్శితమైంది. లాక్‌డౌన్‌ వల్ల థియేటర్లు మూతపడటంతో మంచి కలెక్షన్లతో సాగుతున్న ‘థప్పడ్‌’ సినిమా నష్టపోయింది. అయితే ఓటీటీ ద్వారా తిరిగి మేము ఆశించిన ఫలితాన్ని సాధించగలిగాం. లాక్‌డౌన్‌ అనంతరం ఓటీటీ ప్లాట్‌ఫామ్‌లో విడుదల చేశాం. ఆ వేదికపై కూడా మంచి ఆదరణ సొంతం చేసుకుంది.

భ‌విష్య‌త్తు చేజారిపోతే ఏం చేస్తాం?
0 votes, 0.00 avg. rating (0% score)